අධ්‍යයන පොදු සහතික පත්‍ර උසස් පෙළ විභාගයේ පිළිතුරු පත්‍ර ඇගයීම් කටයුතු ආරම්භ කිරීම ප්‍රමාද වීම හේතුවෙන් දිවයිනේ විභාග කාලසටහන් සැලසුම් තවදුරටත් ප්‍රමාද වන බව ලංකා ගුරු සංගමයේ (CTU) ලේකම් ජෝසප් ස්ටාර්ලින් පවසයි.
ස්ටාලින් පෙන්වා දෙන්නේ දෛනික වැටුප රුපියල් 1000 කට සීමා කර ඇති බැවින් ගුරුවරුන් පිළිතුරු පත්‍ර ඇගයීම් කටයුතු සඳහා අයදුම් කිරීමෙන් වැළකී සිටින බවයි.
“ගුරුවරුන් පිළිතුරු පත්‍ර ඇගයීම් කටයුතු සඳහා අයදුම් නොකිරීමට හේතුව දීමනාව අවම මට්ටමක පැවතීමයි.”
2022 වසරේ සිට ඇගැයීම් කටයුතු ආරම්භ කර නොමැති බවත්, මේ හේතුවෙන් ඉදිරි විභාග ක්‍රමයෙන් ප්‍රමාද වන බවත් ඔහු වැඩිදුරටත් පැවසීය.
වර්තමානයේ මෙම ඇගයීම් ක්‍රියාවලිය ශක්තිමත් කිරීම අවශ්‍ය බව රජය තේරුම් ගත යුතු බවත්, නියමිත වේලාවට විභාග පැවැත්වුවහොත් පමණක් අධ්‍යාපනයේ මෙම අර්බුදකාරී තත්ත්වය අවසන් වනු ඇති බවත් ස්ටාලින් පැවසීය.
“අපට අවශ්‍ය වන්නේ අදාළ වසරේ විභාග පැවැත්වීමයි. එහෙම වුණොත් අධ්‍යාපනයේ අර්බුදය අවසන් වෙනවා.” ඔහු වැඩි දුරටත් පවසයි.
