දේශීය ආදායම් දෙපාර්තමේන්තුවේ (IRD) ලියාපදිංචි වී ඇති සක්රීය විශාල බදු ගෙවන්නන්ගේ ලිපිගොනු සංඛ්යාව 800 ට අඩු වන අතර බදු ගෙවන්නන්ගේ මුළු ලිපිගොනු සංඛ්යාව 350,000 ට වඩා අඩු බව වාර්තා වේ.
ඒ අනුව මෙරට මිලියන 23කට ආසන්න ජනතාවක් අතරින් ආදායම් බදු ගෙවන්නෙකුට ආදායම් බදු නොගෙවන 60 දෙනෙකුට පමණ සහය වීමට සිදුව තිබේ.
මේ අතර දැනට පවතින ඉහළ ආදායම් බදු ප්රතිශතය පහත හෙලීම සඳහා බදු ගෙවන්නන් සංඛ්යාව වැඩි කරන ලෙසට දේශීය ආදායම් දෙපාර්තමේන්තුවේ වෘත්තීය සමිති රජයෙන් ඉල්ලීමක් කිරීමට සූදානම් වන බවද වාර්තා විය.
බදු ගෙවන්නන් වැඩි වූ විට ජනතාව මත පැටවෙන බදු බර අඩු කළ හැකි බව ඔවුන්ගේ අදහසයි.
ජාත්යන්තර මූල්ය අරමුදලේ (IMF) ඉලක්කය විශාල බදු ගෙවන්නන්ගෙන් නිවැරදිව බදු අයකර ගැනීමත්, මධ්යම ප්රමාණයේ බදු ගෙවන්නන් යහමගට ගෙන ඔවුන් විශාල බදු ගෙවන්නන් බවට පත්කිරීමත් බව පැවසේ.
මුදල් අමාත්යාංශයේ මූල්ය ප්රතිපත්ති විධිවිධානවලට අනුව බදු ගෙවන්නන් තවදුරටත් ප්රමාදයකින් තොරව ලියාපදිංචි කර බදු ගෙවන්නන් සංඛ්යාව ඉහළ නැංවීමට යෝජනා කර ඇත. කෙසේ වෙතත් වත්මන් දේශීය ආදායම් දෙපාර්තමේන්තුවේ කොමසාරිස් ජනරාල්වරයාට මෙම තත්ත්වය පිළිබඳව නිසි අවබෝධයක් නොමැති බවත් එම නිසා එම වැඩසටහන අත්හැර දමා ඇති බවත් වාර්තා විය.
කොමසාරිස් ජනරාල්වරයා මේ කරුණු නොසලකා හරිමින් ඒ වෙනුවට අගෝස්තු මාසයේ විශ්රාම ගැනීම කෙරෙහි අවධානය යොමු කර ඇති බවට වෘත්තීය සමිති චෝදනා කළේය.
අලුතින් පිහිටුවන ලද ආදායම් කළමනාකරණ දෙපාර්තමේන්තුවට බඳවා ගැනීම් ද කිසිදු විනිවිදභාවයකින් තොරව සිදු කර ඇති බව ද වාර්තා විය.
මෙම නව කොට්ඨාශයට දේශීය ආදායම් දෙපාර්තමේන්තුවෙන් සිව් දෙනෙකු පත් කර ඇති අතර තවත් හය දෙනෙකු බඳවා ගැනීමට නියමිතයි.
කෙසේ වෙතත්, කිසිදු සම්මුඛ පරීක්ෂණයකින් හෝ ඇගයීමකින් තොරව මුදල් අමාත්යාංශයේ අභිමතය පරිදි මෙම බඳවා ගැනීම් සිදු කර ඇත.
මේ අතර, පත්වීම්ලාභීන්ගේ විශ්වාසනීයත්වය ප්රශ්න කරමින් ක්ෂේත්රයේ බොහෝ පිරිසක් මෙම පත්වීම් විවේචනය කර ඇති බවද වාර්තා විය.
