මේ වසරේ දෙසැම්බර් මාසයට පෙර මැතිවරණයක් පවත්වන බවට හිටපු අග්‍රාමාත්‍ය මහින්ද රාජපක්ෂ ඊයේ ඉඟි පළ කළා.
හිටපු අග්‍රාමාත්‍ය මහින්ද රාජපක්ෂ ඊයේ අභයාරාම විහාරස්ථානයට ගිය අවස්ථාවේදී මාධ්‍යවේදීන් දිගින් දිගටම මැතිවරණ කල්දැමීම සම්බන්ධයෙන් කළ විමසීමකදී දෙසැම්බර් මාසය වන විට මැතිවරණයක් පවත්වනු ඇතැයි තමන් විශ්වාස කරන බව පැවසීය.
මේ අවස්ථාවේදී මැතිවරණයක අවශ්‍යතාවය පිළිබඳව මාධ්‍යවේදියෙකුට ප්‍රතිචාර දක්වමින් හිටපු අග්‍රාමාත්‍ය මහින්ද රාජපක්ෂ කියා සිටියේ දේශපාලනඥයන් මැතිවරණවලට සැමවිටම කැමති බවයි. “ඡන්දයක් එපා කියන්නේ මොන දේශපාලනඥයාද?” ඔහු පිළිතුරු දුන්නේය. ශ්‍රී ලංකා පොදුජන පෙරමුණ සිය දේශපාලන කටයුතු සාර්ථකව කරගෙන යන බවද ඔහු පැවසීය.
එය පාර්ලිමේන්තු හෝ ජනාධිපතිවරණයක් වේද යන්න විමසූ විට පිළිතුරු දීම ප්‍රතික්ෂේප කළ හිටපු අග්‍රාමාත්‍ය මහින්ද රාජපක්ෂ කියා සිටියේ ඉදිරියේදී ඕනෑම මැතිවරණයකට මුහුණ දීමට ශ්‍රී ලංකා පොදුජන පෙරමුණ සූදානම් බවයි. ශ්‍රී ලංකා පොදුජන පෙරමුණ තුළ භේදයක් ඇති බවට මෑත කාලයේ කටකතා පැතිර ගියද ඕනෑම මැතිවරණයකට මුහුණ දීමට සාමාන්‍ය පරිදි සියලු දෙනා එක්වන බව රාජපක්ෂ මහතා පැවසීය.
