විදුලිබල මණ්ඩලය විසින් මේ වන තෙක් විදුලි ගාස්තු සංශෝධනයක් ඉල්ලා නොමැති බව මහජන උපයෝගිතා කොමිසමේ සභාපති ජනක රත්නායක පවසනවා.
ඒ අනුව දැනට තිබෙන දත්ත අනුව විදුලිබිල වැඩි කිරීමේ අවශ්‍යතාවක් නොමැති බව මහජන උපයෝගීතා කොමිසමේ මතය බවයි ඊයේ (01) පැවති මාධ්‍ය හමුවකට එක්වෙමින් ඔහු සඳහන් කළේ. වර්ෂයකට දෙවරක් විදුලිබිල සංශෝධනය විය යුතු බවට මහජන උපයෝගීතා කොමිසම මීට පෙරද දැනුම් දී ඇති බවත් ඒ අනුව දේශගුණය මත පදනම් වී අප්‍රේල් සහ ඔක්තෝබර් මාසවලදී මෙම සංශෝධනය සිදුකළ යුතු බවට 2016 වසරේදී යෝජනා කර තිබූ බවයි ඔහු පෙන්වා දෙන්නේ.
ජනවාරි හා ජුනි මාසවල විදුලිබිල සංශෝධනය සිදු කිරීම ප්‍රායෝගිකව අපහසු බවත් විදුලි බිල වැඩි කිරීමේ ක්‍රමවේදයක් ඇති අතර එසේ නොවුනහොත් ඉන්ධන මිල වැඩිවන ආකාරයෙන් පසුදින උදෑසන අවදිවන විට විදුලිබිල වැඩිවී තිබෙනු ඇති බවත් ඒ සඳහා මහජන උපයෝගීතා කොමිසම එකඟ නොවන බවයි ජනක රත්නායක වැඩිදුරටත් සඳහන් කළේ.
